وصيت لقلبي الجزء 1لايفوتكم
وصيت لقلبي الجزء1
ورة عمرها 17 سنة .. صف ثاني ثانوي علمي .. تعيش ويا يدها علي (بو سالم ) ويدتها ( خصيبة ) أم سالم لسبب بتعرفونه بعدين ..
----
عمها سالم العود .. حرمته شيخة ..
وعيالهم خليفة (28سنة ) مسماي على عمه المرحوم أبو نورة ، متزوج بزوينة بنت عمه سعيد وعنده ولد اسمه عبدالرحمن ( 5 سنين ) ..
عايشة (25سنة ) متزوجة من راشد وساكنة في عيمان
مبارك ( 21 سنة ) يدرس في تقنية دبي ويا سلطان وهم ربع الروح بالروح
عليا ( 20 سنة ) تدرس في جامعة زايد ومحيرة لفيصل ولد عمها
مريم (19 سنة ) تدرس في جامعة الإمارات
----
عمها الثاني سعيد .. حرمته سلامة
وعيالهم زوينة ( 25 سنة ) ومتزوجة من خليفة
خالد ( 24 سنة ) يدرس برا البلاد
سلطان ( 20 سنة ) يدرس هندسة كمبيوتر في تقنية دبي
ميرة( 17 سنة ) كبر نورة وفي صفها
يوسف ( 13 سنة )
عمتهم فاطمة متزوجة من خلفان وساكنين في العين
وعيالهم عبدالله (29 سنة ) متزوج بهند وعنده حمدان (6 سنين ) وحميد( 5سنين ) وعفرا ( سنة )
فيصل ( 24 سنة) ويدرس ويا خالد برا البلاد
أسماء ( 19 سنة ) وتدرس في جامعة العين ودوم ويا بنت خالها مريم
عبيد ( 12 سنة )
----
هذي هي عايلة علي بن سالم .. لكن شخصيات كثيرة راح تظهر من خلال القصة وبتغير مجراها تغير كبير ..
*****
بيت واسع وكبير كله نخل وشير .. عاليمين ميالس الرياييل .. وعلى اليسار مساحة خضرة غاوية لليلسة ومغطي البقعة شير علشان الواحد لما ييلس فيها يقدر ياخذ راحته
الساعة الحين 4.30 العصر ، يوم الاربعا
داخل البيت نورة توها نازلة من غرفتها لانها توها ناشة من الرقاد .. هذي حالتها من بدت الأجازة الصيفية
سهر بالليل ورقاد في النهار
لكن خلونا نعذرها دام انها بتقوم من الصبح وما بتسوي شي غير اليلسة مجابلة يدران غرفتها
نزلت نورة وهي متعدلة .. حاطة جحال و gloss وردي خفيف وشدو وردي خفيف ولابسة تنورة جينز وبدي وردي وحاطة على جتفها شيلة بيت بيضة فيها ورود وردية صغيرة علشان البدي نص كم .. ورابطة شعرها الاسود الحرير ذيل حصان وشعرها هب وايد طويل لانها قاصتنه يوم عرس بنت عمها عايشة لنص ظهرها ..
ام سالم يالسة تحت في الصالة ومبرزة جدامها دلات القهوة والجاي والجامي والتمر .. ابتسمت نورة ليدتها ابتسامة حنونة وباستها عـ راسها
نورة : صباح الخير يا احلى ام في الدنيا " نورة ما تنادي يدتها الا اماية "
ام سالم : الحين صباح الخير .. قولي مساء الخير .. وأي خير هذا وانتي لا ليلج ليل ولا نهارج نهار
نورة : شو اسوي اماية .. تونا ما كملنا اسبوع من خلصنا الامتحانات .. وبدا الملل .. بس الصراحة انا ايلس في البيت واشبع ملل ولا ارد للمدرسة
ام سالم : وانتي ناوية اتمين جيه طول الاجازة
نورة: لا اماية .. انا اناوية اتعلم الطبخ ان شاء الله واشترك في دورة انجليزي واريد اشتغل صيفي
ام سالم : الطبخ وماشاء الله عليج تعرفين اطبخي .. وهالدورة اللي بتاخذيها بنتكلم فيها بعدين .. لكن شو بعد هالشغل اللي تبي تشتغليه .. بعد فيه شغل صيفي وشغل شتوي ..
نورة وهي تضحك : اماية انا بدور لي مبنى حكومي مثل مستشفى ولا بنك وبشتغل في الاستقبال ولا شغلة بسيطة على الكمبيوتر
ام سالم : وابوي عليكن انتن بنات اليوم .. وشو اللي قاصر عليج علشان تسيري عند الرياييل وتشتغلي وبعدج ما خلصتي المدرسة .. ماظن اني مقصرة عليج بشي ولا ابوج مقصر عليج .. وجان ناقصتنج فلوس قولي .. كم نورة عندنا نحن
نورة في خاطرها تقول "انا ليش قلتلها ادري انها ما بتوافق " : ادري اماية انه ما عندكم غير نورة وحدة .. ويا حلاتها من نورة
ام سالم : مداح نفسه يباله .. كمليها اروحج .. صبيلج جاي واشربي .. من يومين ما كليتي شي .. تريدي اطيحي علينا ولا شو ؟؟
نورة : اماية .. الحين كم سنة وانا عايشة وياج .. وما تعرفي انا شو اشرب وشو ما اشرب .. تدريبي انا ما احب الجاي ولا القهوة
وينفتح باب الصالة ويدخل بو سالم : انا بسألج انتي شو تشربين يوم لا الجاي ولا القهوة ولا الحليب تشربيهم
قامت له نورة وحبته عراسه وقالت : ابوي انا ما اشرب غير عصير fresh ههههه
ام سالم : ويوم بتكبري وتعرسي شو بتشربين جدام الحريم .. بتقولين لهم يبولي العصير هذا مالج
نورة وهي تضحك وتقوم من مكانها : هههه هيه اماية بقولهم اريد عصير .. ويوم الشيخة نورة تقول شي لازم يصير .. صح ابوي ؟؟ وتغمز له
بو سالم : ههههه حسبي الله على بليسج من بنية .. عثرج هب سهلة
نورة : انا بروح برا برسم
ام سالم : اصبري شوي بعدها الشمس قوية
نورة : حلاته خخخخخ
ام سالم : الله يهديج .. حطي شيلتج على راسج لان الهندي برا يسقي الزرع
نورة من برا : ان شاء الله
****
في بيت سالم بو خليفة مريم توها واصلة من الجامعة بعد غياب عن البيت دام اسبوعين بسبب الامتحانات
مريم وهي تصرخ : واخيييييييرا خلصت اففف .. عاشواااا عاشو .. يابس يابس
امها ظاهرة من المطبخ : وطي حسج حريم في الصالة .. وتروح تسلم على بنتها اللي تولهت عليها موت
مريم وهي حاظنة امها : واللي اني اشتقت لج امي .. تراني ما اسوى شي بلاكم
ام خليفة : هههههه فديت بنتي والله .. سيري غناتي وبدلي ثيابج ونزلي علشان اتوايهي الحريم
مريم : ومنو من الحرمات عندنا هالوقت
ام خليفة : ما حد غير ياراتنا بيسلمون على اختج عايشة
مريم : اختي عايشة هني ؟؟؟ شو هاليوم الحلو .. والله اني مشتاقة لها موت .. عرست ونستنا الخايسة
ام خليفة : وابوي عليج من بنت .. خطفي جدامي وخليني اسير اجابل الحرمات
مريم : اوكي مام تشاااااااو
وتربع فوق لحجرتها علشن ترتاح شوي من درب العين الطويل وتغير ثيابها علشان تسلم على اختها واتساعد امها واختها عليا
****
في بيت بو سالم
نورة يالسة على الكراسي الموجودة في حديقة البيت وجدامها اللوحة وترسم ..
تموت على شي اسمه طبيعة .. ما تحب تسافر الا لبلاد تكون فيها طبيعة خضرا
وهي غارقة في تخيلاتها شافت سيارة نيسان داشة البيت والدريشة مفتوحة ووقفت السيارة وظهر منها سلطان وهو لابس sun glasses سودة ومتعصم وشعره الاسود الطويل ظاهر شوي ويبتسم ابتسامة اللي يشوفها بيذوب ومن الصوب الثاني تنزل ميرة
سلطان معروف بهيبته وجرأته وجماله .. ظاهر على يده من امه
ساروا صوب نورة اللي كانت اتعدل شيلتها وادخل قصتها
سلطان : سلام عليج بنت عمي
ميرة : السلام عليكم
نورة : وعليكم السلام .. هلا والله بالقاطعين .. عنبو يومين ما حد يشوفج يالخايسة .. ما كأنه عندج ربيعة تسألين عنها إذا هي حية ولا ميتة ..
سلطان وهو يضحك عليها : شوي شوي بتاكليها
نورة : اوه سلطان انت هني ههههههه شحالك .. متى خلصت الجامعة
سلطان : امس الثلاثا كان اخر امتحان .. فقلت اليوم بمر اسلم على الشواب
نورة : سير بتلقاهم داخل .. وقولهم شواب علشان يكسرك ابوي بالعصا ههههه
راح عنهم سلطان داخل علشان يسلم على يده اللي كان توه ظاهر بيروح العزبة وسلم عليه عند الباب ودش داخل عند يدته
صوب ميرة ونورة ..
ميرة : اسمحيلي والله نوير عاد تعرفيها الظروف
نورة: نوير في عينج .. عاد والظروف .. سكتي بس عن حد يسمعج ويقول شي بعد
ميرة: وانتي شو تسوي برا .. ليكون تكتبين شعر ؟؟
نورة : الحين انا ويهي ويه شعر .. مالت عليج
ميرة : وعليج .. ادريبج هب ويه شي انتي .. قومي نسير داخل عند يدوتي بسلم عليها مشتاقة لها
نورة وهي تقوم من مكانها : اللي يسمعج من كثر ما مشتاقة اربع وعشرين ساعة مطيحة عندها .. يالله بعد بنتصل لمريم علشان اتيي ونخلي السهرة اليوم صباحي هههههه وسهرتنا الليلة خلوها صباحي
ميرة : هههه مالت عليج يالخبلة
****
في مكان اخر من الامارات وبالتحديد في العين دار الزين
الساعة 6.00 المسا
بيت بو عبدالله
ام عبدالله وهي ادق على باب غرفة أسماء : اسوم قومي من الظهر وانتي راقدة والحين بيأذن المغرب
.... هدوووووء ..
ام عبدالله : اسوم وصمخ ايدي عورتني قومي .. هب حالة هذي ..
اسما وهي تفتح الباب وطبعا الشكل " no comment " : هاا اماه شو صاير ؟؟
ام عبدالله : لا حول الله .. ما صاير شي .. بس قومي بسج رقاد متى بترقدين فليل ؟؟
اسما : امي خليني ارتاح ما صدقت افتك من الجامعة والكراف فيها .. متى بخلص منها
ام عبدالله : والله اروحج متعبلة وتعرفي انه شغل بعد الجامعة ماشي .. الحين سيري غسلي ويهج ونزلي تحت بغيتج في سالفة .. وراحت عنها
اسما : الله يعين بس .. وتسمع صوت التلفون اللي في صالة التلفزيون يرن
وراحت وشلته
اسما : الووو
.. : بسم الله الرحمن الرحيم .. من وين ظاهرة انتي ..
اسما : ايه منو انت ؟؟
.. : عنبوج من بنت .. الناس اتقول السلام عليكم هب " ويقلدها " ايه منو انت
اسما وصوتها كله رقاد : ايه اسمع تراني هب فايجة لك بتقول انت منو ولا اصك في ويهك
فيصل : عنلات صداج يالخايسة.. ما تعرفين صوت اخوج .. مب منج .. مني انا اللي متصل ابارك لج علشان خلصتي جامعة
اسما وهي وشوي وبتصيح : فصووولي حبيبي غناتي .. وحشتني موت .. فديت روحك والله .. شحالك .. والله اني مشتاقة لك موووت .. الحين ترد البلاد .. دخيلك رد لنا
فيصل : فصول في عينج .. اصغر عيالج .. قسم بالله تقول حرمة ترمس ريلها.. اصلا انا شو خلاني اتصل .. يالله يالله قلبي ويهج وسلمي على امي
اسما: ايييييه اصبر شوي ما شبعت منك ..
فيصل : وانتي من متى تشبعين من الرمسة مالت عليج
اسما : ما عليه مقبولة منك .. بس علشان انك ما فالبلاد
فيصل : وحتى لو اني في البلاد شو بتسوين .. يالله وايد عاطنج ويه .. باي
اسما : ما عليه .. انزين ما تريدني اوصل سلام لحد ؟؟
فيصل: ما يحتاي اروحي بتصل وبسلم عليها خخخخ
وصك التلفون في ويها
اسما : شوف الهرم .. ما عليه بتشوف ان ما خبرت امي عليك ما اكون اسما خخخخخخخخخ
***
في بيت بو سالم
سلطان : ووين تبي تاخذي دورة الانجليزي ؟؟
نورة : ما اعرف .. بس بسأل ربيعاتي عن المعاهد اللي يعرفنها
ام سالم : وتراها بعد حاشرتني تريد تشتغل
سلطان : شغل شو ؟؟
نورة : اماية هب شغل .. بس تدريب صيفي
ميرة : اللــــــه .. حظج
سلطان : شتدريبه .. يلسي محلج
نورة : ليييييييييييييييييش ؟؟ وانا قلت انك انت اللي بتقنعهم
ام سالم : انا قلتلها بس هي راسها يابس
سلطان : اصلا ما بيكون عندج وقت عشانه
ميرة : ليش ؟؟
ام سالم : هيه صح انا ما قلتلكن .. ترانا بنسافر كلنا العمرة
ميرة : قولي قسم ؟؟
ام سالم : وابوي عليج من بنت .. حرمة شكبري وبجذب عليج
نورة : ههههههههه صدج اماه بنسافر كلنا هالصيف ؟؟
سلطان : هيه كلنا بنسافر
ميرة : ونحن اااخر من يعلم
ام سالم وهي اطالع ميرة : بس ترا اللي شهادته ما زينة ما بيسافر
ميرة : حرام عليكم والله اني شاطرة
سلطان : لا حرام الا ما حرمه الشرع
نورة : افتى الشيخ سلطان
سلطان : شيخ غصبن عنج يالهندية
نورة : والله كلن يرا الناس بعين طبعه
ميرة : ويييييي يوووووووو .. سكتوووووووه خخخخخخخخخخ
سلطان : قسم بالله لو شي خيزرانة هني جان راويتج الادب
ام سالم : صخوا شوي حشرتوني
نورة : الحمدلله انا ضامنة السفرة .. بس ترا العمرة ما تكفيني اريد اسافر مكان ثاني
سلطان : امري الشيخة نورة .. وين تبي اتسافري .. كم نورة عندنا
نورة : اريد اسير ماليزيا ولا تايلند .. ولا اقولكم شرايكم نسافر لندن صوب فيصل وخالد ؟
سلطان : ما تريدي بعد تسافري فينيسيا وروما وسويسرا .. ما حد يعطيج ويه انتي
نورة وهي مادة بوزها شبرين : اهون عليك ؟؟
ميرة : لا ما تهوني عليه بيسفرنا هو صوب فيصل وخالد صدقيني
سلطان : خلاص قررتي انسة ميرة ؟؟.. يالله يدتي انا بسير استعد للصلاة .. بتسيرين ميرة ولا بتيلسين
ام سالم وهي تقوم : وانا بعد بسير .. وراحت عنهم
نورة : لا بتيلس .. السهرة اليوم صباحي ترا هههههه
سلطان : وفلم السهرة عليه
ميرة: وانت منو عزمك ؟؟ راز عمرك ليش
نورة : خليه انتي شعليك .. بس سلطان نريده فلم هندي .. ولا تنسى البيبسي والمقبلات بعد خخخخ
سلطان : اكيد ماشي بلاش عندج انتي .. لا ما بنسى .. وبعد الكلينكس ما بنساه .. يالله باي
نورة وميرة : هههههه بااااي
" العلاقة بين نورة وميرة أكثر من علاقة أخت وأختها بسبب الظروف اللي مرت بها نورة .. لكن شو نوع العلاقة بينها وبين سلطان ؟؟ هل هي علاقة أخوة ولا حب ؟؟
****
في مكان ثاني من دبي .. وفي بيت عوود .. ديكور وأثاث .. أقرب ما يكون لقصر
محمد .. في غرفة مظلمة .. جدامه شاشة كمبيوتر .. هذي هي صديقته
محمد عمره 19 سنة ويدرس طب
أبوه احمد عنده شركة مقاولات عودة
أخته العودة سارة (21 سنة ) تدرس في جامعة زايد
واخته الثانية عنود ( 15 سنة ) بتسير أول ثانوي .. وتدرس في مدرسة خاصة
والصغير حمد ( 4 سنوات ) هذا هو روح البيت
أمهم اليازية .. أم ما في مثلها .. جامعية .. وأحمد ريلها يكون ولد عمها .. يعني زواجهم كان تقليدي
محمد شخص غامض .. نادر ما ييلس ويا اهله .. واذا يلس بيلتزم الصمت .. ما حد يقدر يعرف شو في داخله .. ونظراته تحمل آلاف المعاني .. نظرة حزن ممزوجة بالوحدة ..
يالس جدام الكمبيوتر ويتصفح منتدى هو فيه مشرف .. خبير بالكمبيوتر وأسراره .. يقدر يخترق أي جهاز .. لكن لحد الحين ما حاول أنه يخترق جهاز إلا للضرورة
شاف موضوع في مجلس الخواطر لعضوة اسمها " سكون ليل " وحالتها غير متصل
محمد " آه منج يا نورة .. دومها جيه غريبة وكلامها كله أسرار .. ما أعرف ليش أحس أنه وراها سر .. وسر كبير .. "
رد على الموضوع
أختي :: سكون ليل ::
السلام عليكم ورحمة الله وبركاته
كلماتك تحمل معنى غريب .. ويختفي بين سطورك سر عظيم ..
عندما أقرأ خواطرك أحس بالألم اللي يتملكك ..
وهي ليست من مخيلتك .. ولكنني أعتقد أنها من واقعك ..
في انتظار جديدك ..
:: الكاسر ::
محمد " بنشوف يا نورة شو بيكون ردج .. وفجأة .. ينفتح الباب ويدش منه حمد الصغير ويركض وهو يضحك ووراه عنود وتضحك
محمد وهو يضحك على أشكالهم : أنتي متى بتعقلين ؟؟
حمد : محمد عنودة ما تخليني أشوف القطو والفار
عنود وهي أطالعه بعين : أنزين سير طالعه في غرفة أمي
حمد : لا أنا بطالعه في الصالة
محمد وهو يصك الجهاز : الحين البيت فيه أكثر عن خمس تلفزيونات .. بس ترا شغل العوار يسري في دمكم
عنود : والله متعلمينه منك خخخخخ
محمد : أقول ظهري برا لا أكسرج الحين
حمد : أيوا حمود أظربها
محمد وهو منصدم من حمد : شو حمود بعد هذي .. لا بالله صرت مهزلة .. أيه لا تقول حمود .. شو أنا أصغر عيالك
عنود : ههههههههه وييي حمودي حمودي .. هههه
وفجأة طاااااااخ
عنود : أييه يعور عنبو ذا الويه
محمد : أحلى عنج زين .. تستاهلين .. هذا جزاء من لا يحترمني
عنود : عاش دكتورنا .. الصراحة صدقت أنك أحلى عني .. أصلا أنت أحلى واحد في البيت .. بس هالجمال ما يحد يستفيد منه غير الكمبيوتر .. امممم .. حمودي ظهرنا
محمد : ايواااا .. قولي جيه من الاول .. ثره المدح وراه شي هههه
حمد وهو يمسك بنطلون محمد ويتوسل له ونظرة البرآة " اللي أتذكرني بوسيم اللي في أنا وأخي خخ " في عيونه : هيه محمد ودينا سسي سنتر
محمد : هههههههههه الله ينطبك من ولد .. سسي سنتر مرة وحدة ههههه
عنود : يالله محمد دخيلك والله ملانين
محمد : أن شاء الله .. سيري أتجهزي وقولي لسارة بعد جان بتروح ويانا
عنود وهي تصارخ : عاااااااااااااااشوووووو .. وأخيرا بنظهر ويا محمد كلولولووووووووشششش
وسارت صوب غرفة سارة علشان تقول لها
محمد وهو يرمس حمد : انا اشهد انه اختك تخبلت
حمد يطالعه وهو مستانس لأنه بيظهر
يا ترا منو يقصد محمد بنورة ؟؟ هل هي نورة بطلتنا ؟؟ ولا نورة ثانية ؟؟ وإذا كانت هي .. من وين يعرفها ؟؟
****
الساعة 7.00 المغرب
بيت بو سالم
نورة : تعالي بنتصل لمريم إذا تريد تسهر ويانا
ميرة : أوكي
وسارن واتصلن
شيخة : السلام عليكم
نورة : وعليكم السلام هلا عمتي شحالج
شيخة : اهلين نورة .. بخير غناتي شحالج انتي وشحال عمتي
نورة: بخير وسهالة .. عمتي .. مريم ردت من الجامعة ؟؟
شيخة : هيه غناتي ردت لحظة بزقرها لج
..
ورمسن وسولفن واتفقن انهن يتجمعن اليوم ووياهن عليا في بيت يدتهم
ميرة : الحين شو بنسوي ؟؟
نورة : بنطالع التلفزيون
ميرة : لا .. تعالي فتحي النت اريد أدش المنتدى
نورة : أوكي
****
مبارك يالس في أحد المقاهي ويا ربعه وفجأة يرن تلفونه .. وشاف رقم سلطان ولد عمه
مبارك : السلام عليكم
سلطان : وعليكم السلام والرحمة
مبارك : هلا والله بالورد والشوق والغلا كله " وكان متعمد يرفع صوته "
سيف : شباب لحقوا .. مبارك يالس يكلم غرشوبته
سلطان : ايه خسك الله شو تقول انته
مبارك : هلا فديتج .. لا أنا زعلان منج .. جيه من الظهر للحين ما تتصلين لي
أحمد : والخيييييبة .. مبارك ثرك ظهرت راعي بنات
مبارك : ياخي صخوا شوي خلوني ارمس على راحتي
سلطان : هههههههه ايه اليوم البنات بيسهرون في بيت اماية العودة بتيي ؟؟
مبارك : هيه الغالية اكيد بييج .. وحد يفوت عليه شوفت القمر
سيف : لا بالله الولد رايح فيها
سلطان : انزين بتلاقى وياك في محل .. مال الفيديو يريدن فلم هندي الخبلات
مبارك : مسافة الطريق وبييج يا بعد روحي
سلطان : هههههه الله يعينهم عليك .. سلم على الربع
مبارك : يوصل فديت روحج
وصك مبارك عنه
أحمد : ها مبارك .. شو اخر الاخبار " ويطالعه بنظرة خبيثة "
مبارك : انا بترخص عنكم
سيف : وابوي عليك .. من صجك انت بتسير لها
مبارك : منو هي ؟؟
سيف : غرشوبتك
مبارك : عندي غرشوبة وانا ما ادري ؟؟!!!
عيسى : توك ترمسها جدامنا
مبارك : ههههههههههههاااااااااي .. والله ما اروم استحمل زيادة .. ههههههههههه
سيف: بلاك نقعت مرة وحدة
عيسى : لا الريال خبلت به الحرمة
مبارك : هذا سلطان ويسلم عليكم .. يالس الا اتمصخر عليكم .. يالله تشاو قوم الغراشيب انتو
سيف : ههههههههه الله ياخذ بليسك من ريال .. ما تيوز عن سوالفك البطالية
مبارك وهو يقلده : ما تيوز عن سوالفك .. اقول عيوزنا سكتي
أحمد : ههههههههههههه
سيف : الحين انا عيوز .. ما عليه مقبولة منك .. المخبل يقولون اي شي ههههههههه
مبارك : يالله عيل سلطان يترياني
عيسى : سلم عليه
مبارك : ان شاء الله
سيف : وخلونا نشوفكم عاد
مبارك : ان شاء الله يدتي .. هههههههه
وسار عنهم
هذا هو مبارك ولد سالم عم نورة .. انسان جريء وفرفوش وكلها حياته ضحك في ضحك .. بس بعد انسان له هيبته .. وكل الشباب يحترموه ويستانسون وياه .. وهذا كله من سوالفه اللي ما تنمل
***
وفي بيت علي بو سالم ..
ميرة : بفتح المنتدى اللي مشتركة فيه أنا أول ..
نورة : أوكي ..
ميرة : طالعوا هالعضو .. يالله كيف ما أطيقه ..
نورة : ليش ؟؟
ميرة : ما أدري .. بس يوم يبا يرد على موضوع لازم يتفلسف وايد .. كأنه ما حد يعرف في الدنيا شي غيره هو ..
نورة : حرام عليج .. خلي الريال في حاله .. حتى الأغراب ما سلموا من لسانج ههههه
ميرة وهي أطالعها بعين : أنتي أصلا منو يرمس وياج ..
نورة : هههه عيل ليش ياية بيتنا .. وبعدين منتداكم سخيف وممل الصراحة ..
ميرة : لا عيوني .. انا اعترف أنه منتداكم حلو وايد .. بس عود والأعضاء فيه بالآلاف .. وين الواحد يقدر يبرز نفسه ..
نورة : قولي ما شاء الله .. خلاص باجر منتدانا بيسكر من عيونج .. وبعدين حلاته المنتدى عود .. هني تقدرين تبينين شخصيتج .. إذا الأعضاء عرفوج وأفتقدوج إذا غبتي .. بتكونين أثبتي شخصيتج .. ولو كانوا اللي حواليج بالملايين ..
ميرة: اشتغلت أسطوانة التميز والإبداع .. فكيني واللي يرحم والديج ..
من قالت ميرة هالجملة ونورة سرحانة .. والدمعة في عينها ..
ميرة : آسفة والله نورة ..
نورة : وليش تتأسفي .. عادي ما صار شي ..
ميرة وهي تحاول تغير الموضوع : انزين قومي ننزل تحت عند يدتي لحد ما تيي مريم وعليا
نورة : اوكي بس انا بشيك على المنتدى والايميل وبلحقج ..
ميرة : أوكي على راحتج .. بس لا تتأخري ..
نورة : أن شاء الله ..
وراحت ميرة عنها
نورة " بفتح اول شي المسن .. وبعدين بفتح اخر موضوع نزلته "
افتحت المسن ولقت وحدة بس ما رمستها لأن نورة معروفة أنها ما تحب ترمس في المسن إلا ويا شخص معين !!! ..
موضوع : أنا وليلي .. الكاتبة : سكون ليل
وهي تقرا الردود وترد على كل عضو في رد أروحه .. وشاف أخر رد للمشرف الكاسر ..
نورة " آه منك يا محمد .. شغموضه أنت الثاني .. وهو ليش ما داش المسن ولا المنتدى ؟؟ غريبة !!
ردت عليه :
" وعليكم السلام ورحمة الله وبركاته
أخي :: الكاسر ::
يشرفني مرورك
:: سكون ليل :: "
نورة " ما بقوله شي .. خليه يتحرقص مكانه .. لا أمس ولا اليوم رمسته .. خله يتأدب شوي ههههه .. حرام ما يهون عليه "
وطرشت له رسالة خاصة في المنتدى تقوله أنها هاليومين مشغولة وقبل لا تدخل النت بطرش له رسالة
وبندت نورة الجهاز .. ونزلت تحت عند يدتها وميرة .. وفي بالها آلاف الصور والذكريات .. والمحادثات اللي كانت بينها وبين الكاسر ..
يا ترا شو السر اللي بينهم ؟؟
***
في لندن .. الساعة 3.25 الظهر
فيصل يالس وجدامه اللاب ويلعب به ويصمم بطاقات وشغلات وايد بالفوتوشوب
وفجأة يظهر خالد من الغرفة ..
فيصل : بسم الله الرحمن الرحيم .. أنت منو ظهرك .. منو فك قيودك .. هههههههههااااااااي
خالد وهو يفر عليه علبة الكلينكس : تدري أنك واحد سخيف .. يالهرم أنا ما قايل لك أتوعيني الساعة 1 الظهر .. زين جيه فاتنتي الصلاة
فيصل: لا حشى ما وعيتك .. لو كنت اوعي ميت كان قام ..
خالد : أنزين أنا يوعان الحين ..
فيصل : وشو أسويلك .. أنا عن نفسي شبعاااااان ..
خالد : طالعوا الهرم .. وأنا أقول الحين بيقول أن شاء الله الحين بسير أسويلك شي ..
فيصل : أيه لا تيلس كل شوي تقولي هرم واتسب .. شو أنا مخلفنك وناسنك .. هذا المطبخ جدامك والمطعم تحت ..
خالد : والله عفناها المطاعم .. متى يا رب بنرد للبلاد .. خلاص فيصل انا برد البلاد ما أروم أستحمل ..
فيصل : فديت دار بو خليفة ..
خالد : وأهلها ؟؟
فيصل : اااه .. ياخي ليش اتذكرني .. قوم قوم .. خلاص ما عاد فينا صبر .. بعدنا بنيلس شهر ونص قبل ما يعطونا إجازة .. تعرف أنا في شو أفكر ؟؟
خالد وهو في المطبخ : في شو يا أبو الأفكار ؟؟
فيصل : أول ما أرد الإمارات بملج ..
خالد وهو مظهر راسه من باب المطبخ : بتملج ؟؟ ومنو بتاخذ ؟؟
فيصل : بنتك ..
خالد : بنتي ؟؟
فيصل : يا ربي أنا منو يالس أرمس .. سير أبوي أنت فيوزاتك نقعن .. لهالدرجة يوعان .. ههههههههه
خالد : قلتلك تعال سولي أكل ولا الحين بتخبل ..
فيصل : قول أنته جيه من الأول .. خلني أخلص الشغل اللي في أيدي وبيي أساعدك ..
خالد : يا حظج يا عليا بواحد شرات فيصل .. الله يرزقني بوحدة شراتك ..
فيصل : ههههههههه ياربي .. الله بلاني فيك بلوة ..
خالد : ههههههههه
وكملوا الشباب سوالفهم .. وكل واحد يخفي الشوق اللي فيه لدار بو خليفة الله يرحمه .. ولأهل الإمارات
***
في الإمارات .. الساعة 9.14 م
يدخل بيتهم بسيارته المرسيدس .. ووقفها جدام الباب الرئيسي ..
عنود وهي تنزل من السيارة : اللــــه .. والله السيرة وياك يا محمد ما تتعوض ..
سارة وهي تنزل بعد واتنزل أكياسها .. تعرفوهن بنات مستحيل يروحن مكان وما يشترن شي : هيه والله .. زين بعد يوم ظهرت من غرفتك وخليت هالكمبيوتر شوي ..
محمد : أقول دشن داخل وفكني من حشرتكن .. عنبو بالعات راديو انتي وياها .. حريم ما ألومكن ..
عنود : لا عيوني أنا بعدني بنت ..
سارة راحت عنهم تودي الأغراض غرفتها ..
محمد : أنزين وبنت عاد اللي يسمع ..
عنود تقاطعه : وشو فيهن البنات ؟؟
محمد وهو يتذكر نورة : ما فيهن شي سيري داخل وفيكني من الصدعة ..
عنود : ما بتدخل ؟؟
محمد : لحظة بس برمس حد وبيي .
راحت عنه عنود
محمد " وينج يا نورة ؟؟ من يومين ما رمستج .. ولا حتى طرشتي رسالة .. الله يستر ما يكون صاير شي .. لا أن شاء الله ما يكون صاير شي .. الحين بسير بفتح النت وأن شاء الله تكون داشة .."
وسار محمد فوق غرفته وهو ناوي يفتح النت ويشوف شو سالفتها نورة .. وليش غايبة لها يومين ..
معقولة أنه محمد متوله على نورة وهو ما صار له يومين من رمسها ؟؟ وشو سالفتهم ؟؟ قريب بنعرف السر ..
***
في بيت بو سالم .. البنات اتعشن ويا يدتهن .. وسارت يدتهن عنهن تصلي وتنام .. وعقب عشر دقايق وصلن مريم وعليا ..
مريم : عيل وين اماية ..
نورة: راحت تنام ..
مريم : حرام والله اني مشتاقة لها موت ..
نورة : انتن ليش اتاخرتن ؟؟
عليا : مريم الخايسة اخرتنا .. زين جيه ..
مريم : انزين شو اشوي .. يالسة ارمس ربيعتي ..
عليا : وربيعتج اليوم ما شفتيها .. ما سلمتي عليها في الجامعة ؟؟ ياربي منج .. سيري خلي ربيعتج تنفعج
ميرة وهي ماسكة الكنترول : صخن اشوي يالحشرة وخلني اطالع
عليا: انزين انا استاذن بسير البيت ..
عليا: لييييش ؟؟ حرام عليج يلسي .. الحين بيي سلطان وبيين وياه فلم هندي
مريم : اللــــــــــــــــــه .. كشخة ههه
عليا : ما عليه فديتج مرة ثانية .. بس تعرفين الحين امتحاناتي وبعدني ما خلصت ..
نورة : خلاص الغالية .. الله يوفقج .. وسلمي على عموتي
عليا : يوصل .. يالله ميرة مع السلامة .. اشوفكن يوم الجمعة
ميرة : وين ؟؟ " توها انتبهت الاخت "
نورة : هههههههه لا انتي يلسي طالعي هالمصاخة ..
وسارت عنهن عليا ..
مريم : خييييييييييبة ..
نورة : بلاج ؟؟
مريم : طالعي طالعي ..
نورة : يع عليها ..
ميرة : هاي مضيعة المذهب ,..
نورة : لا هب مضيعتنه .. طاح عنها وهي ترقص .. هههههههاااااااي
مريم : خلاص الدنيا ضاعت .. عنبوها شو لابسة ..
" كانن يطالعن هيفا وهي تغني بوس الواوا ههههههه "
نورة : الحين شو ؟؟ بنيلس طول الليل نشوف هالغش ؟؟
سلطان وهو داش عليهن : .. لا .. بتيلسن طول الليل تصيحن
مبارك : يالله قول يباغمن هههههههههه
نورة : سخيييييف وعبيييييييييط
مبارك وهو يطالعها بذيج النظرة .. اللي الواحد لما يشوفها يذوب منها : عيدي كلامج مرة ثانية انسة نورة ..
مريم : بدينا ..
ميرة : نحن ما نيلس مع بعض الا وتضاربوا ..
نورة : انا ما سويت شي
مبارك : لا محشومة حجية نورة ..
مريم : ههههههههههههههااااااااااااااااااااااااي
سلطان : ايه بلاج تضحكين
مريم : حلوة حجية نورة هههههههه
نورة : سخييييفة
سلطان : لا حول الله .. شفيكم .. يالله ميرة حطي لنا الفلم .. يايب لكم فلم اليوم .. انما ايييييه .. ونورة ومريم قومن المطبخ ويبن لنا شي ناكله ..
نورة : ليش أنت ما أتعشيت ؟؟
سلطان : وين اعشى .. قبل شوي مصليين ورحنا انييب فلم .. وبعدين رحنا الجمعية نشتريلكن علشان اتزطن ..
ميرة : اونك عاد .. ما ادري منو اللي ياكل البرينغلز كله في لقمة وحدة
مبارك : عيل وين عليوه ؟؟
مريم : راحت البيت ما تروم تسهر .. علشان الامتحانات
نورة : مريوم قومي وياي نسوليهم شي
مريم : لا تشغلون الفلم ..
مبارك : لا تخافي ما بنشغله .. بنلعب ورقة دور واحد لحد ما تخلصن
نورة : زين بعد
وراحن البنات عنهم ووياهم ميرة .. ويلسوا الشباب يلعبون
***
" السلام عليك .. شحالك ؟؟ اسفة والله .. بس انا هاليومين مشغولة .. وبعدين انت شو راد على موضوعي .. شاسراره ؟؟ انت تعرف اني ما اخبي عليك شي .. يالله انا بظهر الحين علشان اليوم بنات عمي بيسهرن وياي .. ويوم ادش النت بطرش لك رسالة على الخاص .. والله مشتاقة لك مووت ..
مع السلامة "
هذي هي رسالة نورة اللي كان محمد يالس يقراها
تذكر أول مرة رمسها .. كان داش المسن بايميله الخاص للمنتدى .. يعني هب الايميل الشخصي .. وشاف حد ضايفنه .. وما استغرب لانه اتعود انه الاعضاء يضيفونه وياخذون منه اللي يبونه وخلاص .. سوا قبول .. وكان الايميل online وعرف انها بنت من الايميل ..
:: ما صرت ذيب إلا لأن اللي تحدوني ذياب ::
السلام عليكم ورحمة الله وبركاته
:: الكاسر ::
وعليكم السلام والرحمة
:: ما صرت ذيب إلا لأن اللي تحدوني ذياب ::
أخوي .. أنت المشرف " الكاسر " ؟؟
::الكاسر ::
هيه نعم
:: ما صرت ذيب إلا لأن اللي تحدوني ذياب ::
أنا العضوة سكون ليل مشتركة في المنتدى
:: الكاسر ::
هلا أختي .. أمري
:: ما صرت ذيب إلا لأن اللي تحدوني ذياب ::
أخوي بغيتك اتساعدني
::الكاسر::
أن شاء الله بسوي اللي أقدر عليه
:: ما صرت ذيب إلا لأن اللي تحدوني ذياب ::
نحن ناخذ في المدرسة في الحاسوب برنامج الفيجوال .. والصراحة الابلة ما تعرف اتفهم زين .. والحين لازم نسلم مشاريعنا على البرنامج عقب اسبوع .. والصراحة انا اعرف للبرنامج شوي بس اريد اقدم شي مميز
:: الكاسر ::
يعني تريدين مشاريع جاهزة ؟؟
:: ما صرت ذيب إلا لأن اللي تحدوني ذياب ::
لا أخوي بس بغيت دروس وأفكار علشان اقدر اسوي .. اغلب البنات بتكون مشاريعهن جاهزة وهب من ايديهن .. يا اما من المنتدى او من خواتهن او أي حد ثاني
:: الكاسر ::
أن شاء الله اختي بسوي اللي اقدر عليه .. بس ممكن تعطيني مهلة لليوم الفليل ؟؟
:: ما صرت ذيب إلا لأن اللي تحدوني ذياب ::
خذ راحتك أخوي
:: الكاسر ::
أوكي .. تامريني بشي ثاني أختي ؟؟
:: ما صرت ذيب إلا لأن اللي تحدوني ذياب ::
لا أخوي مشكور .. أنا بظهر .. مع السلامة
:: الكاسر ::
الله يحفظج أختي
محمد " ما كنت اتصور اني بحب بنت في يوم .. بس نورة غير .. فيهــ "
بس سارة دشت عليه وقطعت تفكيره
سارة : بووو .. شو تسوي يالس اروحك ؟؟
محمد : انزين الناس يدقون الباب ..
سارة : ما الومك .. دقيت الباب .. بس انت في شو كنت سرحان ؟؟
محمد : ما كنت سرحان في شي !!
سارة : عليه يا محمد .. قولي أنزين أنا أختك العودة
ابتسم لها محمد وقال : كل شي في وقته حلو
سارة : يعني في شي ..
محمد : يمكن .. ما حد يعلم غير رب العالمين ..
سارة : والله وكبرنا وقمنا نحب هههه
محمد : الحين حد ياب طاري الحب وخرابيطه ؟؟
سارة : قول منو هيه ومن باجر بخطبها لك ؟؟
محمد : شفيج انتي عليه اليوم .. قلتلج ما في شي .. ولو في شي بقولج بس هب الحين
سارة : أوكي على راحتك .. ما بتزل اطالع ويانا التلفزيون ؟؟
محمد : لا بيلس شوي على النت
سارة : شوي ؟؟ بنشوف .. هههههه
وسارت عنه
محمد : الله يعيني عليج
ويلس عاد هو يرد على المواضيع ويشوف الردود بس ما قدر ينسى نورة
يا ترى شو القصة اللي بين نورة ومحمد ؟؟ وشو اللي بين نورة وسلطان ؟؟ ومتى محمد بيطلع اللي في داخله ؟؟ وأسما ؟؟ شو دورها في القصة وشو السالفة اللي كانت امها بتقولها لها ؟؟
***
في بيت بو سالم
مبارك : عنبو هب انسان هذا ..
سلطان : يابوك فلم هندي هذا .. ما تعرف شو فلم هندي
نورة: والله انه الفلم حلو
مبارك : حلو ؟؟ البطل انضرب بميت رصاصة وطاح مليون طيحة وما استوابه شي
سلطان : لا ربع الفلم احداث وثلاثة ارباعه اغاني
مريم : يالله اللي يسمع .. افلام الاكشن اللي اتشوفوها انتوا الشباب ما فيها من هالخريط
مبارك : وين عيل ميرة ؟؟
نورة : ههههههههه
مريم : ههههااااي سارت اتصيح على راحتها
مبارك : والله انتوا البنات ما عندكن سالفة
سلطان : اقول انا بسير ارقد
مبارك : وانا بعد
مريم : ليش ؟؟
سلطان : شو اللي ليش ؟؟ الساعة 1
نورة : انزين بعده
سلطان : شو بعده .. اذا انتن ما فالحات ترا نحن ورانا شغل
مبارك : شو مريم بتردين البيت ؟
مريم : هيه تعباااااانة
سلطان : انزين عيل زقري ميرة بعد
نورة : ليش ؟؟ ميرة بتيلس وياي
سلطان : لا باجر بيونا عرب لازم اتقوم الصبح اتساعد امي
نورة : اففف شو ها .. انا شو ايلس اسوي اروحي
مبارك : سيري رقدي احسن لج عن السهر
نورة : والله لو مشتركة في تدريب صيفي جان اتغير الوضع
سلطان : نورة .. نحن اتكلمنا في هالموضوع
مبارك : شو السالفة ؟؟
سلطان : بقولك بعدين .. يالله تصبحون على خير
وكل حد راح بيته يرتاح ويرقد .. الا نورة اللي يلست اتقلب في هالقنوات وما لقت شي مفيد
نورة " يا ترا شو اتسوي الحين يا محمد ؟؟ بسير افتح النت .. ادري اني ما بحصله بس بشوف المنتدى "
***
في مدينة العين .. وبالتحديد في منطقة الجيمي
فلاح : شو اسوي انزين لازم انتظر شوي
... : لين متى يا فلاح ؟؟ الحين مرتين اجلنا العرس
فلاح : خلاص هذي اخر مرة .. بخلي بنت اختي تيلس ويا جواهر وبقول لها اني مسافر ..
... : بتجذب عليها يا فلاح ؟؟ والله تراني ما ارضاها حرام والله .. مب حرام انك خذتني بدون هي ما تدري ؟؟
فلاح : هيه لازم تتفهم وضعي .. عشر سنين وانا انتظر .. ما عندي غير هالولد
جواهر : فلاح منو يالس اترمس من الصبح
فلاح : خلاص احمد انا بخليك الحين .. لا بتصلك باجر ان شاء الله .. وانت من اهله
جواهر : منو ترمس ؟؟
فلاح : كيف انا يالس ارمس الريال وانتي ترمسي ؟؟
جواهر : وليش تهمس وانت ترمس ؟؟
فلاح : عيل تبيني ازاعج .. شفيج انتي اليوم .. انا بسير ارقد تصبحين على خير
وسار عنها
جواهر ودموعها تنزل على خدها " حرام انه وراك شي يا فلاح ..هب انا اللي تخبي عليه يا فلاح .. يا ربي شو اسوي .. يا رب ساعدني .. والله مالي ذنب اني ما سويت غير هالياهل .. ليش فلاح يعاقبني انا ؟؟ ليش يا ربي .. اااااه تعبت والله تعبت من حياتي .. وينج يا ايام زمان .. وينج ؟؟ وينج ؟؟ "
وصاحت جواهر .. صاحت حظها العاثر .. صاحت لحد ما جفن الدموع بعينها .. سوت كل شي علشان تسعد فلاح .. ما كان يعيبها أي شي غير انها ما رامت تحمل الا مرة وحدة .. مرة وحدة ويابت هزاع .. لكن مرت عشر سنين .. وهي كل ما تحمل اتسقط .. حاولت في كل مكان علشان تتعلاج .. لكن مافي شي فوق ارادة رب العالمين
فلاح هو خال نورة .. عمره 29 سنة .. متزوج وهو صغير .. واتزوج جواهر عن قصة حب قوية .. لكن الظاهر انه ما رام يصبر اكثر .. لان فلاح بطبعه يموووووت في اليهال والعيال .. لكن ارادة رب العالمين كتبت له ولد واحد " هزاع " وعشر سنين وهو ينتظر .. وصبره نفد ..
***
في دبي
.•:*¨`*:•. الحـ ـ ـ ــــب .•:*¨`*:•. :
هلا والله بالغلا كله
.•:*¨`*:•. الحـ ـ ـ ــــب .•:*¨`*:•.
توه ما نور الماسنجر
.•:*¨`*:•. الحـ ـ ـ ــــب .•:*¨`*:•.
وينج ؟؟
:: وصيت قلبي عليك :: :
السلام عليكم
.•:*¨`*:•. الحـ ـ ـ ــــب .•:*¨`*:•.
وعليكم السلام ورحمة الله وبركاته
:: وصيت قلبي عليك :: :
عنبو اول ما دشيت استلمتني
.•:*¨`*:•. الحـ ـ ـ ــــب .•:*¨`*:•.
شو اسوي ؟؟ مشتااااق ؟؟ حرام عليج
.•:*¨`*:•. الحـ ـ ـ ــــب .•:*¨`*:•.
يومين ما ترمسيني .. ليش عاد ؟؟
:: وصيت قلبي عليك ::
قلتلك مشغولة
.•:*¨`*:•. الحـ ـ ـ ــــب .•:*¨`*:•.
وشو هالشغل اللي يشغلج عن ريلج .. حتى خمس دقايق ما فضيتي ؟؟
:: وصيت قلبي عليك ::
ريلي ؟؟
.•:*¨`*:•. الحـ ـ ـ ــــب .•:*¨`*:•.
هيه ريلج .. عندج مانع ؟؟
:: وصيت قلبي عليك ::
لا ما عندي مانع .. عندي محمد
:: وصيت قلبي عليك ::
هههههههههه
.•:*¨`*:•. الحـ ـ ـ ــــب .•:*¨`*:•.
فديت هالضحكة يا ربي
::وصيت قلبي عليك ::
انزين شحالك
.•:*¨`*:•. الحـ ـ ـ ــــب .•:*¨`*:•.
دامج بخير تراني بخير
:: وصيت قلبي عليك ::
انزين انا بظهر
.•:*¨`*:•. الحـ ـ ـ ــــب .•:*¨`*:•.
بدينا ؟؟
:: وصيت قلبي عليك ::
بدينا شو ؟؟
.•:*¨`*:•. الحـ ـ ـ ــــب .•:*¨`*:•.
انتي ادشين بالايام .. ويوم ادشين خمس دقايق ما اتكملين
::وصيت قلبي عليك ::
حمود نعسانة بسير ارقد .. كان عندنا عيال عمي وسهرنا وطالعنا فلم واستانسنا
.•:*¨`*:•. الحـ ـ ـ ــــب .•:*¨`*:•.
سلطان كان موجود ؟؟
:: وصيت قلبي عليك ::
هيه
.•:*¨`*:•. الحـ ـ ـ ــــب .•:*¨`*:•.
اففففف .. هالانسان انا ما احبه ..
:: وصيت قلبي عليك ::
محمد هالسالفة انتهينا منها .. قلتلك انا ما احبه .. كانت خرابيط المراهقة .. بس الحين هو شرات اخوي ..
.•:*¨`*:•. الحـ ـ ـ ــــب .•:*¨`*:•.
وهو يعتبرج شرات اخته ؟؟
:: وصيت قلبي عليك ::
أكيد .. اممممم ما ادري .. بس اكيد
:: وصيت قلبي عليك ::
المهم الحين .. انا بظهر .. تصبح على خير
.•:*¨`*:•. الحـ ـ ـ ــــب .•:*¨`*:•.
باجر متى بشوفج ؟؟
:: وصيت قلبي عليك ::
امممم بعد صلاة المغرب اوكي
.•:*¨`*:•. الحـ ـ ـ ــــب .•:*¨`*:•.
خلاص تم
:: وصيت قلبي عليك ::
اوكي تصبح على خير
.•:*¨`*:•. الحـ ـ ـ ــــب .•:*¨`*:•.
وانتي من اهله
:: وصيت قلبي عليك ::
مع السلامة
.•:*¨`*:•. الحـ ـ ـ ــــب .•:*¨`*:•.
لحظة نورة
:: وصيت قلبي عليك ::
هلا
.•:*¨`*:•. الحـ ـ ـ ــــب .•:*¨`*:•.
احبج
:: وصيت قلبي عليك ::
ههههههه وانا بعد
.
.
.
قعدت نورة اتفكر كيف الصدفة جمعتها مع محمد .. بعد ما ساعدها في المشروع .. دشت وحبت انها تشكره .. وفي نفس الوقت كان كمبيوترها خربان ..
دوم تسأله في الكمبيوتر وعن برامج الفيروسات .. وكانت تيلس وياه بالساعات .. لكن الشي الغريب انهم تقريبا كملوا شهر يرمسون بعض في مواضيع مختلفة .. شباب اليوم ،، البنات وكيف لبسهن ،، المنتديات ،، ووايد مواضيع مختلفة وكلها اجتماعية .. شهر كملوا لكن لا هي تعرف اسمه ولا هو يعرف اسمها .. اخوي واختي .. جيه ينادون بعضهم ..
لكن مرة محمد قال لها : أختي بقولج شي ..
" وصيت قلبي عليك " : اتفضل اخوي
الكاسر : امممم .. انتي اسمج نورة خليفة علي الــ ...
نورة تمت ساكتة .. كانت منصدمة كيف عرف اسمها
الكاسر : أختي لا تخافي
" وصيت قلبي عليك ": أنت كيف عرفت اسمي ؟؟
الكاسر : كنت متاكد انج نسيتيه وهب متعمدة
" وصيت قلبي عليك ": شو ؟؟
الكاسر : أختي أنتي نسيتي اسمج في المشروع اللي انتي مسويتنه وانا طلبت منج نسخة منه علشان اشوفه وشفت اسمج تحت المشروع
" وصيت قلبي عليك ": اويييييييه .. يا فضيحتي
الكاسر : ليش ؟؟ لا تخافي اختي هالشي بيكون بيني وبينج
" وصيت قلبي عليك ": والله اني هب متعمدة والله العظيم
الكاسر : اختي والله مصدقنج ..
ضحكت نورة وهي تتذكر هالموقف .. وكيف عرفت اسمه ؟؟ حاولت تتذكر كيف عرفت اسمه .. عصرت مخها علشان تتذكر واخيرا ..
الكاسر : ولما اتنزلينه اروحه يتثبت في الكمبيوتر
" وصيت قلبي عليك ": مشكور وما اتقصر .. فهمت
الكاسر : العفو
" وصيت قلبي عليك ": اخوي بغيت اسالك سؤال بس مستحية
الكاسر : اتفضلي اختي ..
" وصيت قلبي عليك " : امممممممم .. شو اسمك ؟؟ << وحطت فيس مستحي
الكاسر : هههه خمني
" وصيت قلبي عليك " : اممم
" وصيت قلبي عليك " : خالد ..
الكاسر : لاااا
" وصيت قلبي عليك ": سلطان
الكاسر : بعد لا .. اخر محاولة
" وصيت قلبي عليك " : انزين شو اول حرف ؟؟
الكاسر: ميم
" وصيت قلبي عليك " : اممم مايد ؟؟
الكاسر : هههههههه لا .. انا محمد
" وصيت قلبي عليك " : محمد ؟؟ ما اتوقعته
الكاسر : ليش ؟؟
" وصيت قلبي عليك " : ما ادري بس ما اتوقعته
الكاسر : ( :
وبعد هالموقف .. كانوا ما يصبرون عن بعض .. كلامهم مافيه أي شي غلط .. اهو يسألها أسئلة في الفوتوشوب .. وهي تسأله عن الكمبيوتر بحكم خبرته .. لكن ابدا ما يرمسون في أمورهم الشخصية
يا ترا كيف قوة العلاقة بينهم ؟؟ وشو نهايتها ؟؟ شو سالفة نورة وسلطان ؟؟ وليش محمد يكرهه ؟؟ فلاح شو سالفته ومنو كان يرمس ؟؟ بنكتشف هالاشياء في الاجزاء الياية
***
يوم الخميس
الساعة : 5.30 الصبح
في مدينة العين ..
قامت أسماء وعيونها منتفخة من الصياح اللي صاحته أمس .. وراسها يعورها وفيها صداع رهيب
راحت وشافت نفسها في المراية ..
أسماء " اااااه يا ربي .. ليش انا يستويبي جيه ؟؟ شو سويت انا ؟؟ يا ربي انا احب مبارك .. ما اريد اتزوج غيره .. ليش اهلي جيه .. ليش بيغصبوني على فهد .. والله اني كرهته .. حرام والله .. "
وبدت مأساة أسماء .. يلست تتذكر ليلة أمس .. الليلة اللي انكتب فيها شقاها
أمس بعد ما سكرت أسماء عن أخوها فيصل سارت لأمها
أسماء : يسلم عليج فصووول
أم عبدالله : الله يسلمه من الشر .. تعالي فديتج بغيتج في سالفة
أسماء : نعم الغالية شو بغيتيني ؟؟
أم عبدالله : أسماء .. الحمدلله انتي اليوم خلصتي جامعة .. وما شاء الله غديتي حرمة .. وابوج قالي ارمسج اليوم
أسماء وهي خايفة : في شو اترمسيني امايه ؟؟
أم عبدالله : بنتي .. فهد ولد عمج يبيج وهو من متى يترياج اتخلصي علشان انرمسج
أسماء وهي منصدمة : شوووو
أم عبدالله : شفيج .. ولد عمج يباج .. بلاج
أسماء : وليش ما قلتولي من قبل ..
أم عبدالله : أبوج وعمج قالوا انخليج لحد ما اتخلصي الجامعة
أسماء ودموعها في عينها : يعني انتوا متفقين ومخلصين ؟؟
أم عبدالله : هيه يا بنيتي .. ولد عمج اولابج من الغريب .. وانتي محيرة له من كنتوا صغار
أسماء : لكن انا ما حد قالي
أم عبدالله : هيه عمج كان يريد السالفة تكون بين الكبار بس
أسماء : لكن انا ما اريد فهد
أم عبدالله : وابووي .. شو هالمنكر بعد .. كيف ما تبغينه .. شو ناقصنه فهد علشان ما تبغيه .. ما شاء الله أخلاق وحلاة ولا بعد طيار .. شو تريدي اكثر
أسماء : لكن فهد شرات أخوي فيصل .. حرام عليكم امي والله .. دخيلج امي رمسي أبوي .. امي دخيلج انا بنتكم الوحيدة
أم عبدالله : يا رب سترك .. شو هالمصيبة .. والله لو قلت لابوج بيقصبج .. اسما .. هالسالفة منتهية .. تريدي ابوج وعمج يتزاعلوا ؟؟
أسماء وهي اتصيح : امي دخيلج والله .. دخيلج خبري ابوي .. ما اريد فهد يا امي .. بتزوجوني غصب ..حرام عليكم والله .. الله ما يرضاها .. حرام والله
أم عبدالله : يابنتي انتي اتعرفي ابوج .. يارب شو اسوي بهالمصيبة
أسماء : خلاص زوجوني اياه لكن لا اتلوموني اذا رديت لكم في اليوم اللي بعده مطلقة
وركضت غرفتها ودموعها على خدها
نزلت دموع القهر والعذاب على خدود اسما البيض .. صاحت وصاحت .. لحد ما ارقدت من كثر الصياح
" قلبي استوى يا الزين عالنار ..
والقلب ما يقوى تغليك ..
تدري وتعلم شالذي صار ..
وتدري بغلاتك كم انا اغليك ..
محتار انا والله محتار ..
محتار فيك ومن ثم احاتيك ..
اخلق لكم من فكري اعذار ..
ثم اعتذر بس لارضيك ..
***
الساعة 7.30 ص
بيت بو سالم ..
نورة " اممم ... الساعة جم الحين .. 7.30 .. لا اكيد شي غلط .. معقولة الساعة 7.30 الحين ؟؟ مع اني راقدة متاخر بس الحين شبعانة رقاد .. احسن بعد .. شو احلى عن فترة الصبح "
وسارت نوير وغيرت ملابسها ونزلت تحت عند يدها ويدتها
نورة : صباح الخير يا ويه الخير
وباست يدها على راسه
بو سالم : هلا والله ببنيتي .. ما شاء الله اليوم ناشة من غبشة ..
نورة : اروحي مستغربة من عمري ..
ام سالم وهي داشة الصالة وماسكة صينية فيها دلة الجاي والقهوة ..
ام سالم : من وين ظاهرة الشمس اليوم ؟؟
نورة وهي تقوم ليدتها وتاخذ عنها الصينية : بلاج امي ؟؟ جيه اول مرة اقوم بدري ؟؟ تراني ايام المدارس اقوم الصبح
ام سالم : قصورج بعد ما تنشي للمدرسة
بو سالم : شفيج عليها .. خلي بنتي في حالها ..
نورة : فديت ابويه انا .. الوحيد اللي فاهمني ..
ام سالم : وابوووي .. وانا وين رحت ؟؟
نورة : كلكم غاليين عليه والله .. فديتكم والله مالي غيركم في الدنيا
كان في حد واقف عند باب الصالة ويتسمع لهم ويبتسم ..
سلطان : وانا بعد غالي عندج ؟؟
نورة : بسم الله .. انت من وين ظهرت
سلطان : انتي من وين ظاهرة .. غريبة .. مب من عادتج انج اتنشين الصبح
نورة : وانت شدراك اذا انا انش الصبح ولا لأ
سلطان : لأني كل اليوم الصبح ايي هني
ام سالم : هلا بوليدي .. شحالك
سلطان : بخير اماية .. شحالج انتي؟؟
ام سالم : الحمدلله.. نورة صبي لولد عمج كوب جاهي
سلطان : شحالك اليوم بويه ؟؟
بو سالم : الحمدلله بخير لولا هالريول ..
سلطان وهو ياخذ الجاي عن نورة : شو رايك ابوي اوديك لندن تكشف عليها
نورة : هيه وتاخذوني وياكم ههههه
بو سالم : لا ابوي وين اروم على السفر وبعد 7 ساعات في الطيارة ..لا لا ما اروم .. يالله انا بخليكم بسير المزرعة
ام سالم : بتتاخر ؟؟
بو سالم : لا برد قبل صلاة الظهر .. مع السلامة
نورة : عاد ابوي لا تسرع ولا تقحص ويلات .. هيه .. نباها السيارة
وكلهم اضحكوا عليها .. وراح عنهم بو سالم
سلطان : من زين السيارة عاد
ام سالم : انا بروح عنكم شوي بسير اشوف هالخدامات شو يسون
نشت نورة وشغلت التلفزيون
وبعد دقيقة ...
سلطان : انزين .. ما جاوبتي على سؤالي
نورة وهي مستغربة : أي سؤال ؟؟
سلطان : انا غالي عندج ؟؟
انصدمت نورة .. وسكتت شوي
سلطان : بلاج صخيتي .. عيل انا هب غالي عليج
نورة : لا اكيد غالي عليه هب ولد عمي
سلطان وهو فاك المكشخ : اشكر فنج با بنت العم .. يالله تامريني بشي ؟؟
نورة : وين بتسير وبتخليني
سلطان استانس في خاطره : بسير اتحوط
نورة : اخييي .. عيل الحين بيلس اروحي ؟؟
سلطان : شو رايج انسير المزرعة عند يدي ؟؟
نورة : اللــــــه .. من متى ما سرت المزرعة .. بسير اقول لامي
وركضت نورة
سلطان " حليلها ما صدقت .. اكيد يالسة في البيت ولا حد يظهرها .. زين بعد بونسها شوي "
وبعد ربع ساعة تقريبا سار سلطان ونورة ووياهم ام سالم المزرعة واتفاجأ فيهم بو سالم بس استانس عليهم ويلسوا لحد صلاة الظهر ورجعت ام سالم ونورة ويا بو سالم .. وسلطان كان بيرد بيتهم .. بس ام سالم حلفت عليه انه يتغدا وياهم فرجع وياهم بيت بو سالم ..
***
الساعة 1.17 الظهر
مبارك " انا متاكد انه شي صاير .. الله يستر بس "
ام خليفة : مبارك .. مبااااارك .. واابوي شوفيه الولد
مريم هزته : مبارك
مبارك : بلاج ؟؟
مريم : امي من متى تزقرك
ام خليفة : بلاك ابويه ؟؟
مبارك : ما فيني شي امي .. عن اذنكم
ونش عنهم
ام خليفة : حرام انه الولد فيه شي .. قومي وراه مريوم شوفي شوفيه الولد .. هو دوم يخبرج انتي
عليا : امي بلاج خايفة جيه .. يمكن شي شاغل باله
ام خليفة : لا الولد من الصبح وهو سرحان وشكله مهموم
مريم : انا بسير اشوفه
ام خليفة : اتسوين خير
***
في العين ..
فيصل : امي انتي قولي لابوي انج بعدج ما قلتيلها .. انتظري لحد ما انيي وبتفاهم وياها
ام عبدالله : يا ولدي انتي بتتاخر ..
فيصل : كلها شهر ونص وانا برجع .. وتراهم صابرين سنين ما بياثر فيهم شهر ولا شهرين
ام عبدالله : شورك وهداية الله
فيصل : لا تحاتين يا امي .. هاي اسوم الا تدلع .. اوعدج اني يوم بيي بقنعها
ام عبدالله : انزين ابويه .. سلم على خالد ..
فيصل : يبلغ الغالية ..وانتي سلمي على الاهل كلهم .. مع السلامة
ام عبدالله : الله يحفظك
عبدالله : شحالج الغالية ؟؟
ام عبدالله : اهلين ولدي .. متى ييت ؟؟
عبدالله : الحين ياي .. ليش ما تبيني .. خلاص بظهر انا << وما صدق نش بيظهر
ام عبدالله : تعال انت وين رايح .. لا كنت يالسة ارمس اخوك فيصل عن شي
عبدالله : شخباره هو ؟؟
ام عبدالله : الحمدلله يسلم عليكم
عبدالله : الله يسلمه .. الا ما قالج متى بيرد ؟؟
ام عبدالله : بعد شهر ونص ان شاء الله .. والله ودي يرجع اليوم قبل باجر
عبدالله : كلنا نباه يرجع اليوم قبل باجر .. بس خلاص هانت
ام عبدالله : الله يستر بس
عبدالله : ليش شو صاير ؟؟
ام عبدالله : والله شو اقولك ..
عبدالله : شو ؟؟
ام عبدالله : انت تعرف انه اسما محيرة لفهد ولد عمك .. وانا امس رمستها في السالفة ..
عبدالله : انزين ؟؟
ام عبدالله : رفضت
عبدالله : شوووووووو
ام عبدالله : اتقول انه فهد شرات اخوها
عبدالله : بس هو ما اخوها .. والله بذبحها هالبنت ..
ام عبدالله : حرام عليك .. ما اريد اغصبها على شي .. لا تنسى هاي بنتي الوحيدة وما عندي غيرها
عبدالله وهو معصب : هذا اخر دلعكم .. والحين تريد تتنقى الريايل ؟؟
ام عبدالله : يا ولدي حرام عليك .. انت لا تقول لها شي
عبدالله : كيف ما تريديني اقول لها شي .. شو بيقولون عنا الناس
ام عبدالله : انا رمست فيصل وقال هو بيقنعها .. تعرف انت كيف اسما تحب فيصل .. لا تقول لها شي وخلنا نتريا لحد ما يوصل فيصل
عبدالله وهو يقوم من مكانه : بننتظر وبنشوف اخرتها ويا بنتج
***
بيت بو خليفة
بو خليفة : وين عيل سلطان ؟؟
ام خليفة : من سار الصبح بيت عمي ما رجع
بو خليفة : ما اتصلتي له ؟؟
ودش سلطان من باب الصالة ..
ام خليفة : ولد الحلال عطاريه
سلطان : السلام عليكم
بو خليفة + ام خليفة : وعليكم السلام والرحمة
ام خليفة : وين كنت غناتي؟؟
سلطان : كنت في بيت امي العودة
بو خليفة : لين الحين ؟؟
سلطان : هيه تراني الصبح وديت امي العودة ونورة المزرعة عند يدي وبعدين حلفت عليه اماية العودة الا اتغدى وياهم
ميرة : ليش نورة ناشة من الصبح ؟؟
سلطان : سأليها " ويبتسم وهو يتذكر نورة وهي تقوله انه غالي عليها "
بو خليفة : انزين انا بسير ارقد .. سلطان بعد صلاة العصر لا تظهر بغيتك في سالفة
سلطان : ان شاء الله ابويه
ونش بو خليفة وياه حرمته علشان يرقدون ..
ميرة : شو سويتوا في المزرعة ؟؟
سلطان : شو سوينا .. ما سوينا شي
ميرة : انزين شخبارها نورة ؟؟
سلطان : بخير
ميرة : انزين
سلطان : انزين ؟؟
ميرة : ما بتظهرني اليوم ؟؟
سلطان : وين تبي تروحي ؟؟
ميرة : بتظهرني صج ؟؟
سلطان : بشوف .. ويمكن ناخذ ويانا مبارك وخواته
ميرة : ونورة ؟؟
سلطان : اكيد .. عيل نخليها اروحها
ميرة : عاشووووو .. وين بنروح ؟؟
سلطان : ما ادري .. بس مبارك بيودي خواته يتجهزن للسفر
ميرة : هيه صح نسيت سالفة السفر .. عيل انا بسير اتخبر نورة
***
مريم : شو بلاك بروك ؟؟
مبارك وهو يطالعها بنص عين : بروك في عينج
مريم : فديتك والله .. شو بلاك
مبارك : اقول مريم ..
مريم : هلا
مبارك : اتصلي في اسما شوفي شخبارها
مريم : ايوا قول جيه من اول ..
مبارك : الحين بتتصلي ولا شو ؟؟
مريم : لا تخاف انا امس مرمستنها المغرب وما كان فيها شي
مبارك : هذاك المغرب .. والحين الظهر .. قومي اتصلي ..بسرعة ..والحين وجدامي بعد
مريم : انزين انزين
مبارك كان خايف لان اسما كل يوم قبل لا ترقد اطرش له مسج وهو نفس الشي .. بس طبعا مريم ما تدري بهم .. وامس ما طرشت له مسج فعرف انه فيها شي
مريم : لحظة بسير اييب تلفوني
مبارك : بسرعة
وبعد دقيقة تقريبا
مريم : ها شو الاحوال عندك
مبارك : طالعوا هذي .. احر ما عندي ابرد ما عندج .. اتصلي بسرعة
مريم : انزين انزين عن تاكلني .. الحين بتشوف انه ما فيها شي وبتلقاها ترقص بعد
مبارك في خاطره : ان شاء الله
طوط طوط << اونه التلفون يرن خخخخخ
في الجهة الثانية .. اسما كانت قبل عشر دقايق ناشة بس ما قامت من مكانها لان راسها كان يعورها من كثر الصياح اللي صاحته
اسما " ياربي هذي مريم .. شو اسوي الحين "
مريم : السلام عليج بنت العمة
اسما وصوتها << تعرفون وحدة هلكانة من الصايح : وعليكم السلام ..
مريم : شفيج اسوم ؟؟
مبارك من سمع هالجملة على طول سحب التلفون من ايد مريم
اسما : ما فيني شي
مبارك : اسمــا ..
اسما وهي منصدمة .. هذا مبارك .. لا لا ..
اسما : مبـــا .. وما كملت ..
مبارك : اسما شو فيج ؟؟ ليش اتصيحي ؟؟
اسما : .. << ما ينسمع غير صياحها
مريم : هات التلفون .. شفيك انت
مبارك : قلتلج انه فيها شي ..
مريم : انزين انا بسير ارمسها من غرفتي ..
مبارك : لا تتاخرين .. وطمنيني
مريم : ان شاء الله
***
شو راح يصير في قصتنا ؟؟ راح اتصير احداث عمركم ما اتوقعتوها !! وراح تظهر شخصيات بتغير من القصة بشكل كبييير ..
***
الساعة 3.00 الظهر
بيت بو سالم
نورة " ااااه .. نعسااااانة .. بس ما برقد .. احسن انظم رقادي "
وقطع افكارها صوت التلفون
نورة " حد يتصل الحين ؟؟ شو هالناس .. " : الووو
سعاد : السلام عليكم
نورة : وعليكم السلام ورحمة الله وبركاته
سعاد : أنتي نورة ؟؟
نورة : منو أنتي ..
سعاد : أنا وحدة
نورة : صج ؟؟ يا سبحان الله .. اتصدقين عاد كنت اتحسبج واحد هههههه
سعاد : فديت هالضحكة يا ربي
نورة : منو انتي ؟؟
سعاد : معجبة
نورة : شوووووو
سعاد : ليش مستغربة ؟؟
نورة : ايوااااا .. ناقصة انا .. منو عطاج الرقم
سعاد : ما اقدر اقول
نورة : انزين ؟؟
سعاد : شو ..
نورة : انتي شو ؟؟ شو اتريدي
سعاد : قلتلج انا معجبة فيج والله
نورة : اللهم طولج يا روح .. حلن عني افففف ما صدقت اتيي الاجازة وافتك من اشكالكن .. اقول ريحي عمرج تراني ما راعية هالسوالف ولا احبها
وصكت الخط في ويه سعاد
نورة " ياربي .. من وين ظهرت لي هذي .. كله مني انا عطيتهن ويه من اول شي .. حليلي اقولهن يبن يصيرن ربيعاتي وعااااادي .. امحق ربيعات .. بنات اخر زمن .. بسير افتح النت احسن لي "
***
منقول
0503761005
|
العرض العادي
