شموخ الاسئلة ..

يضيق الليل في وجه .. الحزين .. الوافي .. المرتاب=وسكونك يالمسا يكسر شموخ الأسئلة فيني
تردد داخلي احساس مدري صادق او كذاب=ولكن مهما كان .. او كان .. يكفي انه معنيني
يصك الياس في وجه الأمل بوّاب عند الباب=يقول إني مقدَّر لك سهر ما غمضت عيني
ألا يا مشعلة فيني جنون الحب والأحباب=انا لي كم سنة "داله فكر" مرتاح من حيني
صحيح ان الهوى يابنت قالوا في المثل غلاب=ولكن الحياة ادروس .. أكيد انك فهمتيني
دخيل الله على جيشن متاريسه جمال اهداب=غزا يومن غزا كنه سلبني حق توطيني
وانا مثل الذي كنه فقد في محنته لـ اصحاب=يصيح بجرهدي روحه ألا يامن يخاويني
بضمك يا طفل بردان .. يرجف .. خايف .. ومرتاب=وأنا آسف .. ترى اللي فيك كله تركة سنيني