تســـــــــــــــاؤلات

هلا عد الجروح اللي شكيت همومها و الحال=هلا عد النجوم و عد كون الله و اجرامه
هلا.....و بعد الهلا اهدي سلامن يحمله المرسال=لعند صوحبي اللي تكدّر ليله ما نامه
و اقول: همومها الدنيا جدايد ما تصير سمال=ندهت افراحها و جتني على الخدين لطّامه
و طغى شعر الحزن فيني و حرّك خافقي و البال=و تجلى في سطور الشعر وقتن زادت الآمه
لمست بخافيات القاف شي(ن) كنّه الغربال=شي(ن) له خفق قلبي و تفجر كل الهامه
ابسأل يا الخوي قلّي وش اللي غيّر الاحوال؟=من اللي نزّل العالي من اللي نكّس اعلامه؟
من اللي سار في دربن تعب ثم ما وصل للتال=و غدى مثل الصويب اللي شكى من كثرة اسهامه
ابسأل يا الخوي قلّي من المقتول و القتّال؟=انا و لا انت؟..و لا الحظ؟..و لا الوقت و ايامه؟
تبدّل طبعها ربعك و صار قياسها الاموال=اذا جيبك ثقيل اليوم كل(ن) يحني القامه
تشوف اللي اشتهر عنّه جبان و كنّه التمثال=تكلم عنه ديناره و علّاه للسما هامه
غريبن فيك يا دنيا الرزين و ما معاه المال=زمانه عانده و اقفى و تلاشت كل احلامه
وش اللي صار يا دنيا؟؟ انا قبلك شكيت الحال=تشتت هاجسي فيها و عشت الحزن و اوهامه
همومي كنّها ظلّي و جرحي دامين لا زال=تعبت اشكي.....تعبت ابكي...و كنّي وسط دوّامه
تعبت القى سنافيها و اشوف ان الحريم رجال=غريبن كل ما فيها و لكن...جلّت احكامه
يخوي اصبر...و انا اصبر تهون و صادقن من قال=وكاد ان السنا يظهر اهي من قيضها غمامه
اعلل ضامري و انسى و ابدد حيرتي بآمال=و اساير ليلها الداجي بثبات و رجل مقدامه
طعوني و ان تمادت بي لها مع حلّها ترحال=و ترد البسمه لشفاهي و اودع حزني و اعوامه
و صلاة الواحد العالي عدد ما في الصحاري رمال=على خير الأنام اللي بعثه الله بأسلامه