عاهدت نفسي يا هوى البال ما أنساك..

مايهزني إنسان · 05-09-2008, 11:41 PM

صباح / مساء الخير يا أحلى أعضاء

أخباركم؟؟؟؟؟؟؟

المهم.. هذي أول روايه أنزلها من كتاباتي...

واتمنى اني ألقى تفاعل عشان أكملها..
المهم ماراح أطول عليكم بنزل لكم الجزء الاول..

صحيح الشخصيات كثيره بس ما راح تضيعون

اتمنى لكم قرأه ممتعه

بسم الله نبدأ:

الشخصيات..
*بيت أبو إبراهيم (الجد): أبو إبراهيم"صالح"....أم إبراهيم "لطيفه"
وعياله: "إبراهيم- مشاعل- هيا- هيفاء-منيرة- حلا"
- إبراهيم"أبو صالح":
صالح: عمره 15 سنه بثالث متوسط
العنود: عمرها 10 سنوات برابع ابتدائي
- مشاعل:
زياد: عمره 20 سنه ثاني سنه بالجامعة
خالد: عمره 18 سنه بثالث ثانوي
الجوري: عمرها 22 سنه متخرجة من الثانوي وجالسه بالبيت
غلا: توأم زياد عمرها 20 سنه بثاني سنه بالكلية
- هيا :
ريوف: عمرها 23 سنه آخر سنه بالجامعة
ريما: 20 سنه بثاني سنه بالجامعة
- منيرة:
الوليد: عمره 20 سنه بثاني سنه بالجامعة
نواف: عمره 19 سنه أول سنه جامعه
ريماس: عمرها 17 سنه بثاني ثانوي
ديما: عمرها 3 سنوات
- هيفاء:
فيصل: عمره 24 سنه أول سنه له بالوظيفة يشتغل بالاتصالات
جود: عمرها 19 سنه أول سنه بالجامعة
ريناد: 18 سنه بثالث ثانوي
فارس: 14 سنه بثاني متوسط
- حلا: آخر العنقود أصغر الخالات عمرها 25 سنه
****************************
*بيت أبو فهد(الجد): أبو فهد"سعد" أم فهد"فاطمة"
عياله: "عبدالرحمن -فهد- محمد- عبدالله- خلود"
- عبد الرحمن" أبو فيصل": زوج هيفاء التعريف بعيالهم فوووق
- فهد"أبو سلطان":
سلطان: 21 سنه بثالث جامعه
سديم: 18 سنه بثالث ثانوي
- محمد"أبو يوسف":
يوسف: عمره 26 سنه مدرس كيمياء
ليان: عمرها 19 سنه بأول سنه بالكلية
رهف: عمرها 17 سنه بثاني ثانوي
- عبد الله: آخر العنقود عمره 26 سنه ثاني سنه له بالوظيفة يشتغل بأرامكوا
- خلود"أم ياسر":
رغد: عمرها 17 سنه بثاني ثانوي
ياسر: عمره 13 سنه بأولى متوسط
راكان: عمره سنه ونص
**********************
"عاهدت نفسي يا هوى البال ما أنساك"
____________________________
يوم الأربعاء آخر أيام الدراسة للفصل الدراسي الأول الساعة 6 مساءً
كالعادة بهالوقت يكون الكل نايم وواحد ورى الثاني يصحون من النوم
في بيت أبو فيصل
فيصل كان بسااااابع نومه ويدق جواله
"أنت مو قد الكلام كل يوم لك كلام أنت تلعب بالقلوب أنت جاهل بالغرام"
فيصل: الووووووو
نهله: مساء الخير حبيبي
فيصل:مساء النور هلا نهله
نهله:أخبارك يا قلبي؟
فيصل: تماااام كيفك أنتي؟
نهله: أنا بخير دامك بخير..حبيبي وش في صوتك لا يكون نايم وأنا أزعجتك
فيصل: لا عادي خذي راحتك ..المهم قلبي أبوي يناديني أكلمك وقت ثاني"تصريفه" مع السلامة
نهله: اوكي أنتبه لنفسك..يلا مع السلامة
بعد ما قفل الخط.......
فيصل: والله هالبنات نشبه ما ينعطون وجه..أنا اللي قاهرني إن الكل يركض وراي واللي أبيها مو معطتني بال بس أنا وراها والزمن طويل..آآآآه بس آآآآه.. أبنزل أحسن لي
قام وغسل وجهه وغير ملابسه ونزل تحت..البيت كان هدووووووووء راح للصالة شغل التلفزيون وجلس يقلب بالمحطات ويحاول يلهي نفسه... لمن مل وطلع مع الشباب
************************
..........: الوو
.........: هلا حلا
حلا: هلا ريناد ..كيف الحال؟؟
ريناد: تمااااااام..أخبارك أنتي؟؟
حلا: الحمد لله بخير
ريناد: حلا بتطلعين اليوم وإلا نجي أنا وجود مع أمي إذا جات؟؟
حلا: لا ماني طالعه حياكم
ريناد:الله يحييك ..اوكي حلا بروح اصحي جود ونلبس و عسانا نلحق على أمي
حلا:اوكي ..يلا مع السلامة
ريناد:سلااااااام
ريناد:جوووودي
جود: هااااااه
ريناد:يلا بنروح بيت جدي
جود: ما راح أروح
ريناد: بلا سخافه وش يجلسك هنا لحالك قومي وسعي صدرك
جود: يوووووووووه ريناد تكفين خليني أنام
ريناد: والله بكيفك أنا بروح البس وبروح مع أمي
جود"توها تستوعب": وين بتروحين؟؟
ريناد:لي ساعة وأنا أقول لك بنروح بيت جدي
جود وهي تقوم من السرير: اااااااااااااي والله راااسي بينفجر
ريناد:كملي نوم
جود: لا بروح معك
ريناد:طيب بسرعة أمي بتطلع بعد شوي
جود :اوكي
طبعا الثنتين راحوا يغيرون ملابسهم
"في بيت الجد صالح"
ريناد: خالتي حلا سمعتي أغنية أصالة لا تخاف
حلا: لا والله ما سمعتها
ريناد: يوه لا تفوتك اسمعيها في مقطع يعجبني وش بدايته يا ربي!! جويد وش بداية المقطع الثاني من لا تخاف
جود: لا تعذر باحتياجك كلنا نا..
تقاطعها ريناد: ايه ايه صح..لا تعذر باحتياجك كلنا ناقص حنان كلنا طفل يتمنى أي شخص يحضنه نبني الدنيا وحدنا نوقف بنفس المكان للأسف ينقص وفانا مع مرور الأزمنة
جود: ما ادري اتوطى ببطنك وإلا اتوطى ببطنك
حلا:هههههههههههههههههههههههههههههههههه
ريناد:وليه تتوطين ببطني أنا وش مسويتلك؟؟
جود:مره ثانيه لا سألتي وجاوبتك خليني اكمل بلا هالصرقعه الزايده
حلا: يعني ما تعرفين أختك دااايم مطيوره
ريناد:أقول الشرهة مو عليك الشرهة علي أنا اللي أبي أقول لك الكلمات
"صدفه ومن بين كل الناس علقني من يوم شفته وعيني جات في عينه"
حلا: الووو
.....:هلا حلا
حلا: هلا رويفه وش تبين تراك ازعجتيني اليوم كل شوي متصلة
ريناد تكلم جود: يا كرهي لها هالبنت غثه
جود: أنا ما أهضمها شايفه نفسها وترفع ضغطي
ريناد: أقول وش رايك نعزم بأبوي بكره نمشي الدمام أحسن من مقابل وجهها
جود:أمممممم والله ما عندي مانع بس أنتي الله يسلمك كلمي أبوي
ريناد:ذكريني أول ما نرجع البيت أكلمه
حلا تكلم ريوف: اوكي مع السلامة
حلا: تسلم عليكم ريوف
جود و ريناد: الله يسلمك ويسلمها
ريناد: طبعا بيجون بكره
حلا: بكره الخميس اكيد بيجون
ريناد: يا حراااأم ما راح نشوفهم تصدقين اني مشتاااقه لهم
حلا:وليه ..أنتوا ماراح تجون بكره
ريناد: والله ما ادري بس احتمال ما نجي يمكن نروح الدمام
حلا:اهااااا
الساعة 1 أم فيصل وعيالها راحوا بيتهم وطبعا كل واحد على فراشه وعلى طووووول ناموا
***********
يوم الخميس الساعة 11 صباحاً
أم فيصل: يا عيال يلا قوموا تراكم ذبحتوني لي ساعة اصحي فيكم ولا واحد منكم متحرك
ريناد: يمه تو الناس وش يودينا من الصباح
أم فيصل: أي صباح!!!! الحين بيأذن العصر وأنتم نايمين
ريناد: جد يمه!! كم الساعة
أم فيصل:الساعة 2.30 يلا قوموا
ريناد: إن شاء الله
وتقوم ريناد وتصحي البيت كله<<مزعجه
الكل جهز الحين فيصل وصلهم بيت الجد صالح البيت اللي كل خميس تجتمع فيه العايله
دخلوا البيت ..
جود: غريبه ماجاو خالاتي
فارس: بذمتك احد يجي الساعة 12
ريناد: اييييييييييش!!!! كم كم الساعة
فارس:12
ريناد:أقول صلح ساعتك ..يوم تصحينا أمي تقول الساعة 2.30
جود :و أنتي مصدقه..أمي مصحيتنا من 11
ريناد: افااااا يا يمه تكذبين
أم فيصل: لو اني قايله لكم إن الساعة 11 كان ما تحركتوا من مكانكم وكان ماجينا بيت جدك إلا المغرب
ريناد: هذي مو اول مره تسوينها فينا بس خلاص مره ثانيه مانيه صاحيه إلا بعد ماتصحينا بساعة
جود: كل مره تقولين هالكلام و بالنهايه محد يرج البيت إلا أنتي
فيصل: والله لمن دخلتي تصحيني لو فيني حيل كان كفختك بس والله مالي نفس اتحرك
ريناد: احمد ربك جايه اصحيك
فيصل: الناس يفتحون الباب بشويش وبعدين يتكلمون بهدوووووء مو يقولون"فصيل قم ترى بيأذن العصر بسرعه قم" كأني اصغر عيالك
جود+فارس+أم فيصل:ههههههههههههههههههههههههههههههههه
ريناد:هذا جزاي اصحيك تشوف من يصحيك مره ثانيه
فيصل: يقال انها زعلت ..بالطقاق لاتصحيني
بهالوقت دخلت خالتهم منيرة
منيرة: السلام عليكم
الكل:وعليكم السلام
طبعا وقفوا يسلمون عليها
ريناد: فصيل اطلع البنت بتدخل رح المجلس مع وليدو ونوافوه
فيصل: ياخي احترمي نفسك واحترمي أخوك الكبير وان ما احترمتيني احترمي عيال خالتك اللي أكبر منك
ريناد: والله كيفي يعني تبيني أقول له عمي الوليد وعمي نواف!!!
فيصل:والله الكلام معك ضاااايع بروح مع الأولاد اصرف
ريناد: سكر الباب وراك
"طلع فيصل وترك الباب مفتوح ع الآخر"
ريناد:يعاند ويبيني اسمع كلامه
خ منيرة: مهما كان هو الكبير
ريناد: لا تصيرين مثل أمي كل ما قلنا شي قالت هو أخوكم الكبير احترموه
خ منيرة: ايه وهي صادقه
ريناد: والله هذا اللي خلاه يتدلع الكل يدافع عنه شوفي وشلون صاير خكري
جود: هههههههههههههههههههه لا يسمعك بس
ريناد: خليه يسمع
إلا بدخلت الجد
الكل قام يسلم.. جلس الجد مع بناته يسولف معهم
والبنات راحوا لغرفه ثانيه عشان ياخذون راحتهم بالسوالف..
ريماس: يوووووه والله اني مييييته من الجوع
جود: وش نقول احنا اللي من 11 صاحيين وللحين ما أكلنا شي
دخلت عليهم الجده
قاموا يسلمون
ريناد: جدتي وين خالتي حلا
الجده: توها صاحيه تلبس وتنزل
ريماس: ومتى بتحطون الغداء
الجده:لمن يجون خالاتك وخوالك
ريناد: ياسلااااااااام واحنا نموت من الجوع على حسابهم
الجده: كلها ربع ساعة بالكثير ويكونون كلهم هنا.. هذا خالتكم هيا وصلت
ريناد بصوت واطي: الله يعيننا عليها وعلى عيالها
ريماس سمعتها: ههههههههههههههههههههههههههههههههههه طنشيهم
جود:اوووووص
ريوف: هاااي بنات
ريما: السلام
البنات:وعليكم السلام
دخلت حلا
حلا: السلام
البنات: وعليكم السلام
ريناد: كان كملتي نوم من زمااان جايين وتوك تفكرين تنزلين
حلا: يا الدبه والله أمس نمت متأخره
ريناد"بمزح":آخر مره لا عاد تعيدينها فاهمه وإلا أعطيك كف يفهمك
حلا:هههههههههههههه فاهمه يا آنسه ريناد
ريوف: ياربي يا رينادوه عليك اسلوب مو حلو احترمي خالتك
ريناد: اتوقع اني كلمتها ما كلمتك وأنا ما طلبت رايك وقلت قيمي اسلوبي
ريوف: بس اسلوبك مو حلو غيريه
ريماس: بالعكس يالبى قلبها رنوده اسلوبها يجنن كل شي عندها بمزح وما تاخذ الأمور بجديه
ريوف: والله من خفة العقل
ريناد: هوووووو هوووووو هذي اللي يبي لها تكفخ
جود وفيها الضحكه: ريناد تعوذي من الشيطان وقومي نتغداء
حلا+ريماس+ريما...ابتسامه بس من داخل ميتين من الضحك على ريناد و ريوف
ع الغداء..طبعا كل البنات معهم خالتهم حلا جالسين بجهه
جود: ريماس الله يعافيك عطيني بيبسي
ريوف: البيبسي مضر اشربي مويه وإلا عصير احسن
جود: ماراح اشربها كلها أنا و ريماس بعلبه
ريناد: والله مطاوعتها أنتي"تكلم جود"
جود:"لا تعليق"
ريناد: ريماس عطيني بيبسيه
ريوف: نصيحه خذي عصير والله حلووو بارد
ريناد: حتى البيبسي حلووو وبارد
ريوف: بكيفك
ريناد: ادري
منيرة: هيفاء"أم فيصل"
هيفاء: هلا
منيرة: لو احد تقدم لجود تزوجينها؟؟!!
كل النظرات توجهت على جود
جود وجهها احمرررر
هيفاء: ليه في احد قايل لك انه يبيها؟؟
منيرة: والله وحده شايفه جود وكلمتني عنها وقالت أسأليهم اذا عادي يزوجونها الحين
هيا: ايه والله حتى ريوف متقدم لها واحد الأسبوع اللي راح
ريناد بصوت واطي لحلا وجود : بدينا الحين يبدا شريط مدح بعيالها
حلا+جود:هههههههههههههههههههههههههههههههههههههههه
بعد الغداء..
البنات طلعوا الدور الثاني لغرفة خالتهم حلا
حلا: بنات عندي فلم هندي جديد من تبغى تشوفه معي
جود: من الممثلين
حلا: عمران هاشمي و
ريما: بس لا تكملين شغليه بدون نقاش
حلا: اوكي
الكل منسجم مع الفلم
اللي تمسح دموعها واللي تتخيل إن المواقف صايره لها ...الخ
أنتهى الفلم..
جود: ما عندك فلم ثاني
حلا:إلا والله
ريوف: لا خلاص طفشت ما أبي اشوف أفلام وش رايكم نقول للأولاد يطلعوننا
ريناد: ليه قالوا لك سواويق أبوك هم؟؟؟؟؟؟
ريوف: هذا جزاي أبيكم تغيرون جو
جود: والله فكره بتصل على فيصل وأسأله
"لبيه قالوا لك وأنا أقول لبيه كل من طلبته يا غلا القلب لباك"
فيصل:هلا جوودي
جود:فصول وش جالسين تسوون؟
فيصل: نلعب بلايستيشن..ليه وش عندك؟
جود: بصراحه طفشانين ونبي نطلع نتمشى
فيصل:والله بقول للوليد ونواف إذا رضوا طلعناكم
جود: طيب بسرعه ورد لي خبر
فيصل: لحظه..الوليد البنات يبون يطلعون نطلعهم وإلا لا
الوليد: لمن تنتهي المباراة
فيصل رجع يكلم جود: اسمعي ربع ساعة وتكونون جاهزين
جود:طيب طيب يلا سلاااام
جود: بنات ربع ساعة وتكونون جاهزين
ريناد: أنا جاهزه بس البس عبايتي
جود: أنا بروح اصلي
ريماس: وأنا بعد
حلا: توكم تذكرون الصلاه!!
ريوف: بصراحه حتى أنا ماصليت
ريما: أنا وريناد وخالتي حلا صلينا بننزل تحت
ريماس: اوكي نصلي وننزل وراكم
بعد ربع ساعة.. الكل جاهز
فيصل بسيارته لومينا اس اس السودا
البنات طلعوا وراحوا على سيارة فيصل
جود: اقو ل أنا اللي مكلمته وبالنهاية مالي مكان يلا وحده منكم تزل وتروح مع الوليد
ريماس: أنا مع اخوي بس وحده تجي معي
ريوف: أنا اعذريني بصراحه أخوك متهور وأنا مو بايعه نفسي عشان أروح معه
ريناد: أنا بجلس مع اخوي
حلا: جود روحي أنتي مع الوليد
جود: طيب طيب أنا أوريكم
وتروح عند سيارة الوليد ألتيما 2006 سودا وتركب طبعا الوليد مو وموجود بالسيارة
ريماس كانت جالسه قدام وجود وراها
جود: ريماس أخوك عنده أغنية تنحط ع الجرح
جود : أكييييد
تو ريماس مشغله الأغنيه إلا ركب الوليد
الوليد: السلام
ريماس+جود: وعليكم السلام
جود: مساء الخير الوليد
الوليد: هلا والله مساء النور..أخبارك يا..أممممم ..أنتي جود صح؟؟
جود: ايه..الحمدلله بخير
الوليد يكلم ريماس: أنتي اللي مشغله الاغنيه؟؟
ريماس: ايه .. ليه عندك مانع؟؟؟؟؟
الوليد: لا والله بجد ذوق شغلتيها بوقتها"طبعاً يقصد بكلامه جود..جود مو معهم كأنت بعالم ثاني فـ ما أنتبهت للكلمة"
"الوليد يحب جود من يوم هو صغير وجود بعد تحبه بس محد منهم يدري عن مشاعر الثاني "
نواف وهو يفتح الباب اللي قدام عند ريماس..
نواف: أقول يا آآآنسه ارجعي ورى
ريماس: بسم الله .. أنت بتروح معنا
نواف: وش رايك؟؟
ريماس: طيب بسم الله علي برجع ورى
ونزلت ريماس وركبت ورى مع جود
في سيارة فيصل ..
"أنت مو قد الكلام كل يوم لك كلام أنت تلعب بالقلوب أنت جاهل بالغرام"
فيصل:الووووووو
نهله: هلا فيصل ..أخبارك يا قلبي؟؟
فيصل:الحمد لله بخير
نهله:شكلك مشغول؟؟
فيصل: ايه والله طالع مع الأهل
نهله: اوكي أخليك يا قلبي وأول ما تفضى اتصل
فيصل: اوكي..يلا سلام
نهله: مع السلامة

انتظر ردودكمـ...

عاشقة ديرتها · 05-10-2008, 01:36 PM

حبيبتي الغاليه مايهزني انسان

قصة في قمة الروعه رواية بحق ممتعه

أعجبت بها كثيير أشكرك على هذه القصه

الجميه في انتظار الأجزاء القادمة

مايهزني إنسان · 05-10-2008, 10:53 PM

اقتباس:

المشاركة الأصلية كتبت بواسطة عاشقة ديرتها

حبيبتي الغاليه مايهزني انسان

قصة في قمة الروعه رواية بحق ممتعه

أعجبت بها كثيير أشكرك على هذه القصه

الجميه في انتظار الأجزاء القادمة

مرورك الأروع يا قلبي..

هذا من ذووووووقكـ يا الغلا

ان شاء الله قريب انزل الجزء الجآآي..

تسلمين يا قلبي ع المتابعه

نورتي الروايه بطلتكـ..

ريمية نجد · اليوم, 03:58 PM

يسلموووووووووووووو

				جميع الحقوق محفوظة لمنتديات المنطقة الشرقية